Киләсе уку елында мәктәпләрдә «Россиянең рухи-әхлакый мәдәнияте» дәресләре керә башлый

Россия Мәгариф министрлыгы агымдагы, 2026 елда мәктәпләрдә «Россиянең рухи-әхлакый мәдәнияте» дәресләрен этаплап кертә башлаячак. Бу хакта ведомство җитәкчесе Сергей Кравцов сөйләде, дип хәбәр итә РИА Новости.

«Яңа уку елында «Россиянең рухи-әхлакый мәдәнияте» фәнен этаплап кертү башланачак, бу фән буенча шулай ук дәреслекләр әзерлибез», – дип белдерде министр.

Яңа дисциплина 2026/27 уку елының икенче өлешеннән бишенче сыйныфларда, ә 2027/28 уку елыннан – алтынчы һәм җиденче сыйныфларда кертеләчәк.

Максат — укучыларда традицион рухи-әхлакый кыйммәтләргә нигезләнгән дөньяга караш формалаштыру. Балалар дәүләт, җәмәгать һәм мәдәният эшлеклеләренең, шулай ук галимнәр һәм хәрбиләрнең, шул исәптән махсус хәрби операция геройларының тормыш юлларын һәм карашларын өйрәнәчәкләр.