Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) биологик актив өстәмәләр сатуны тыю турындагы проект документын урнаштырган. Бу хакта «Коммерсантъ» газетасы хәбәр итте, дип яза «Рен-ТВ».
Проект нигезендә, БАДлар сатуны тыю өчен 5 төп нигез барлыкка киләчәк. Бу – дәүләт теркәве булмау, тыелган матдәләр табылу, җитештерүче турында тулы булмаган мәгълүмат күрсәтелү, туклану продуктлары буларак сатылу һәм составлары кабул ителгән нормативлардан тайпылу.
«Тәкъдим ителгән критерийларның кирәклеге турында һөнәри бергәлек вәкилләре күптән сөйли», – дип белдергән клиникалар челтәре хуҗасы Зарема Омарова.
Роспотребнадзор башлыгы Анна Попова кагыйдәләрне 2026 елның 1 мартыннан кертү тәкъдиме белән чыгыш ясаган. Эксперт сүзләренчә, әлеге чара биологик актив өстәмәләр базарын сыйфатсыз продукциядән чистартырга мөмкинлек бирәчәк.