«Кичен суши ашадылар». Өч баланың икесе сәер генә вафат булган

Красноярск өлкәсенең Балахтин районында ике бала сәер үлем белән вафат булган, дип хәбәр итә «Вести» каналы.

Балаларның анасы сүзләренчә, аның алты яшьлек кызы һәм дүрт яшьлек улы роллы ашап агуланырга мөмкин. Әни кеше үзе кафеда официант булып эшли. Кичен ул кафедан роллы алып кайтып, балаларына ашата.

Район депутатлар советы NGS24.ru басмасына балалар үлеме турында хәбәрне раслаган. Күп балалы бу гаилә Балахты шәһәреннән бер сәгатьлек юл ераклыгында урнашкан кечкенә генә авылда яши. Өч баланы 30 августта көндез аңсыз килеш табалар. Бер кызны табиблар коткара. Кызганычка каршы, аның энесенең һәм сеңлесенең гомерен саклап кала алмыйлар. 

«29 августта кич белән әни кеше суши һәм роллы алып кайта. Ул үзе официант булып эшли торган кафедан азык-төлек алып кайтып, балаларына ашата. Иртән бар да яхшы була. Өч бала йокыдан уяна, әбисе һәм әнисе белән чәй эчә. Аннары балалар өлкәннәрне эшкә озата. Әби кеше эштән кайтканда, балалар аңсыз була. Бер кызны Балахта хастаханәсенә илтәләр. Ә 6 яшьлек кыз белән 4 яшьлек малай үлә», диелә бу хәбәрдә.

Роспотребнадзор белешмәсе буенча, балаларның үлеме роллы ашап агулану белән бәйле түгел. Чөнки гаиләдәге башка кешеләр һәм биредә яшәүче башкалар агуланудан зарланып хастаханәгә мөрәҗәгать итмәгән. Ведомство япон ризыгын ясаучыны да тикшерә. Бу турыда ТВК каналы хәбәр итте.

Хәзер фаҗига сәбәпләрен полиция ачыклый, диелә бу хәбәрдә.

«Комсомольская правда» хәбәр иткәнчә, фаҗига Малая Тумна авылында булган. Бүген балаларны җирлиләр.

Экспертлар өйне тикшергән. Җинаять эше ачылган.

Танышлары сүзләренчә, башта әни кеше үзен гаепли. Гаилә яхшылар рәтендә санала. 29 августта кафеда әзер роллар һәм суши артып калган. Әни кеше шуларны өенә алып кайтып балаларына ашаткан. Иртән балалар әниләрен эшкә озатып калган. Әби кеше сәгать унбердә эштән кайтканда, 7 яшьлек кыз гына исән була. Аны хастаханә табиблары коткарып кала, ике нәни баланың үлемен раслыйлар, диелә бу хәбәрдә.