«Кичә генә дүрт кеше һәлак булды» - Татарстан юлларында һәлак булучылар саны арткан

Ел башыннан бирле Татарстанда 1448 юл-транспорт һәлакәте теркәлгән. Аларда 151 кешенең гомере өзелгән, шуларның алтысы – балалар. Бу хакта «Татар-информ»да узган матбугат конференциясендә сөйләделәр.

«Бүгенге көнгә республика юлларында 151 кеше һәлак булды, бу, узган елның шушы чоры белән чагыштырганда, 26га күбрәк. Кичә генә юлларда дүрт кеше һәлак булды», - дип белдерде Эчке эшләр министрлыгының Татарстан Республикасы буенча Дәүләт автоинспекциясе идарәсе башлыгы, полиция полковнигы Рөстәм Гарипов.

Быел Татарстан юлларындагы юл-транспорт һәлакәтләрендә 1747 кеше төрле тән җәрәхәтләре алган, дип өстәде ул.