Краснодарда кибеттә 7 яшьлек малайга эт ташланган. Эт баланың битен тешләгән. Бу хакта Россия Эчке эшләр министрлыгының Краснодар буенча идарәсенең Телеграм-каналында хәбәр ителә.
Балага эт ташлану турындагы хәбәр хокук саклаучыларга 17 майда килгән. Бочарников урамындагы кибеткә сатып алучылар зур эт белән кергән. Ул бәйдә булса да, авызы томаланмаган булган.
Бала яныннан узып барганда, эт малайга ташлана һәм битен тешли. Эт хуҗалары исә моңа игътибар бирми, берни булмагандай чыгып китәләр.
Балага зур зыян килмәгән, әмма котыруга каршы профилактик вакцинаның беренче дозасын алган.
Бу факт буенча тикшерү эше бара.
