Бурятиядә хатын-кыз иске тимер кибеткә кагылгач, мизгел эчендә үлгән. 2025 ел башында Нижняя Иволга авылында яшәүче хатын-кыз сәүдә белән шөгыльләнергә була һәм үз ишегалдында кечкенә кибет урнаштырып куя. Аның алгы өлеше урам якка чыгып торган, һәм шул фаҗигагә сәбәп булган. Бу хакта «Комсомольская правда» сайты яза.
Электрга тоташтыру өчен, хатын электрик яллый. Ир-ат үз эшен эшли, тик хәзер билгеле булганча, барлык иминлек кагыйдәләрен тупас рәвештә бозып эшләгән була. Берникадәр вакыт узгач, сәүдә эше туктый, бина буш килеш торган.
Төзек булмаган электр чыбыгы үз эшен эшли. Берара кибетнең тимер конструкцияләренә ток килә башлый. Ә үлем тозагы үз корбанын бөтенләй көтелмәгән җирдә сагалап тора.
22 август иртәсендә, шушы тирәдә яшәгән хатын-кыз урамга йөрергә чыга. Очраклы рәвештә ул куллары белән кибетнең тимер стенасына тотына. Көчле разряд аңа исән калуга бер шанс та калдырмый. Хатын-кыз, ни булганын аңларга да өлгермичә, урында ук һәлак була.
«Хәзер хатын-кыз үлеме буенча тикшерү эше бара. Тикшерүчеләр бу хәлнең бөтен сәбәпләрен ачыклый. Фаҗиганең төгәл сәбәбен ачыклау өчен, махсус электротехник тикшеренү билгеләү мәсьәләсе хәл ителә. Ул электр чыбыгындагы хилафлыкларның нәкъ менә кай җирендә булуын күрсәтәчәк», – дигәннәр республика буенча Тикшерү комитетында.
