«Киңәшче итеп кенә куймасын» — Ришат Төхвәтуллин Башкортстан Башлыгы белән аралашкан
Җырчының Радий Хәбиров белән күптәннән шәхсән танышасы килеп йөргән.
Ришат Төхвәтуллин туган ягы Туймазыда узган чарада җырлаган. Анда Башкортстан Башлыгы Радий Хәбиров та килгән булган. Җырчының Радий Хәбиров белән күптәннән шәхсән танышасы килеп йөргән, аны инстаграмда даими күзәтеп бара икән. Форсаттан файдаланып, Ришат сәхнәдән Башлык янына төшә. Алар бик җылы кочаклашалар.
«Мин дә сезне күзәтәм. Искиткеч талантлы артист, башкаручы. Горурланабыз», — дигән Радий Хәбиров.
«Бөтен сәхнәдәшләремнең сезнең белән сэлфилары бар. Минеке генә юк», — дип Ришат Радий Хәбиров белән фотога да төшкән.
Җырчының бу видеосын телеграм каналлар да тарата. «Киңәшчесе итеп кенә билгели күрмәсен», — дип төрттергәннәр анда Ришатка, җырчы Элвин Грейның Республика Хакимиятендә җаваплы вазифа биләвен искә алып.
«Интертат» Элвин Грей исеме белән җырлаучы артист Радик Юлъякшинның Башкортстан Башлыгы киңәшчесе итеп билгеләнүе турында язган иде.
Инстачылар исә, гадәттәгечә, Ришатның шәп тавышына сокланган. «Сез җырлаганда тәнемә каз тәннәре чыга», «Сез иң тыйнак, зәвыклы, матур, тәрбияле җырчы», — дип мактаганнар.