Кешеләр яңа урында ни сәбәпле начар йоклый?
Кешенең баш мие һәрвакытта да әйләнә-тирәдәге чынбарлык белән «танышырга» тырыша.
Яңа урынга ятканда, еш кына кешеләр начар йоклый. Бар да тәртиптә, имин, тыныч булса да, йокысыз төн узарга мөмкин. Бу кешенең баш мие — гадәтләр колы булуга бәйле, диелә фактлар сайтында.
Асылда, кешенең баш мие һәрвакытта да әйләнә-тирәдәге чынбарлык белән «танышырга» тырыша, ял итәр өчен имин һәм уңайлы урын эзли.
Таныш булмаган урынга килгәч, кешенең борынгы инстинктлары хайвани курку хисен уята. Акылы белән кеше әйләнә-тирәсендә ерткычлар тулган урман булмавын аңласа да, аңсыз дәрәҗәдә ял итү кыен була.
Браун университеты галимнәре оештырган экспериментлардан күренгәнчә, таныш булмаган урында беренче төнне уздырганда, баш миенең уң як ярымшары бераз гына ял итсә дә, сул як ярымшары чамадан тыш активлаша. Эксперимент вакытында төрле яктан кискен тавышлар яңгыратып караганнар. Шул чакта уң яктан килгән тавышларга (аларны баш миенең сул як ярымшары эшкәртә) кеше ешрак игътибар иткән, сул яктан килгән тавышларга исә — киресенчә, тынычрак караган.
Эксперименттан күренгәнчә, куркыныч турында кисәтү механизмы икенче төнгә тынычлана, өченче төнгә исә бөтенләй юкка чыга. Сәяхәт вакытында начар йокласагыз, үзегезнең мендәр яки юрганыгызны алып йөрү хәерле, диелә бу хәбәрдә.