26 июльдә Ростов-Дон шәһәрендә аквапаркта 4 яшьлек бала батып үлгән. Фаҗига булган көнне аквапаркта төшерелгән видео чыкты, дип яза «Комсомольская правда» газетасы.
Кадрларда күренгәнчә, малай борттан сикереп төшә. Башта бала белән нәрсәдер булганын аңлап та булмый. Моны бассейн янындагы башка кешеләр дә аңламагандыр, мөгаен. Ләкин соңыннан малай бик нык тыпырчына һәм суны ишә башлый – бераз вакыттан соң кинәт тынып кала. Шушы мизгелдә аңа олылар игътибар итә. Бер хатын-кыз аны бассейннан кулына күтәреп алып чыга.
Бассейннан алып чыкканда, малай әле исән була. Урынга килгән табиблар баланы коткарырга тырыша, тик ул вафат була.
Баланың чигәсендә яра була. Моның сәбәпләрен хәзер тикшерүчеләр ачыклый.
«238нче маддәнең 2нче өлеше буенча «Саксызлык аркасында кеше үлеменә китергән, тормыш яки сәламәтлек куркынычсызлыгы таләпләренә җавап бирми торган хезмәтләр күрсәтү» буенча җинаять эше ачылды, – дип сөйләгәннәр Тикшерү комитетының төбәк идарәсендә.
Баланың әнисенә дә медицина ярдәме кирәк булган. Көчле стресс аркасында ул аңын югалткан. Аның хастаханәгә алып киткәннәр.