Россия галимнәре һәм аларның чит илләрдәге хезмәттәшләре Европада керпеләрнең ничек таралуын өйрәнгән. Биологлар сүзләренчә, матур итеп бию – кешеләр өчен генә түгел, җәнлекләр өчен дә кирәкле осталык икән. Бу турыда «Вести» каналы хәбәр итте.
Керпеләр дә бии белә! Бу бию – никахлашу ритуалы. Ана керпе үзеннән ис чыгара – ул ферромонлы сыекча була.
Ата керпе шушы исне сизгәч, ана керпене чакыра. Моның өчен ул махсус авазлар чыгара. Без аны «фыр-фыр» кебегрәк ишетәбез. Шулай ук бу вакытта ата керпе бии. Бию әйләнү һәм йөгереп-йөгереп йөрү кебек була.
Әгәр бу процессның берәр этабында ниндидер хата китсә, эш барып чыкмый. Мәсәлән, ана керпе башка төрле ис чыгарса, яки ата керпе дөрес биемәсә, алар кавышмый. Димәк, нәни керпеләр дә тумый кала.
Мондый схема гасырлар дәвамында формалашкан, диелә бу хәбәрдә.