Керпе, тиен һәм сукыр тычкан тотып карасаң, кешегә нинди авыру иярә?
Паркларда, бакчаларда керпе, сукыр тычкан, тиеннәр белән якын очрашканда сак булыгыз.
Мондый хайваннарны читтән генә күзәтү хәерле. Бу турыда «Челнинские известия» Казанның ветеринарлар берлеге ветеринар табибы Булат Нуриәхмәтовка сылтама белән хәбәр итте.
«Бу хайваннар - котыру авыруын күчереп йөртүчеләр. Профилактика максатыннан ел саен урманнарда 10нан 20 меңгә кадәр вакцина таратыла. Бу — кечкенә генә брикетлар, сөяк оныннан ясалган алар. Брикет эчендә вакциналы капсула була. Шуны ашагач, хайваннар бер ел дәвамында куркыныч авырудан сакланган була», — ди ветеринар.
Шулай да хайванга вакцина ясалган дип өметләнмәгез. Керпе, тиен, сукыр тычкан кебек җәнлекләргә кул белән орынырга ярамый, аларны сыйпау да тыела! Тиеннәрне кулдан ашатырга маташмагыз, нәкъ менә тиеннәр күп очракта авыру күчерүче була, диелә хәбәрдә.