Хуш исле капучино, йомшак латте яки өйдә ясалган сөтле кофе – күпләр өчен бу эчемлек кенә түгел, ә көндәлек ритуал. Бу дуэт чыннан да файдалы: сөт кофеин тәэсирен йомшарта һәм кальций югалтуны компенсацияли. Әмма кайвакыт сөтле кофе зыян да китерергә мөмкин.
Россия Сәламәтлек саклау министрлыгының Пирогов исемендәге университеты Гастроэнтерология һәм диетология кафедрасы ассистенты, медицина фәннәре кандидаты Ольга Титова кара кофега күчүнең файдасы турында сөйләде, дип яза «Майл. Здоровье» сайты.
Сөтле кофе бөтен кешегә дә туры килми икән.
- Лактоза җитешсезлеге булганда сөт дискомфорт тудырырга мөмкин, ә кальцийны үсемлекләрдән алырга була.
«Бу очракта кофены сөтсез эчү яхшырак һәм кальцийны үсемлек ризыкларыннан (кунжут, чикләвекләр) яки витаминнардан алырга була», – дигән ул.
- Диабет һәм метаболик синдром булганда сөт шикәре (лактоза) глюкоза күләмен контрольдә тотуга комачауларга мөмкин.
«Әгәр артык авырлык һәм канда глюкоза күләме белән проблема, метаболик синдром, 2 типтагы инсулинрезистентлы шикәр диабеты бар икән, сөтле кофены аерым ризык буларак кабул итәргә кирәк. Ә иң яхшысы – кофены сөтсез эчү, чөнки организмда углеводлар алмашын тигезләргә кирәк, ә сөт шикәре – ул шул ук углевод», – дигән табиб.