Күпфатирлы йортларда яшәүчеләр ай саен капиталь ремонт өчен түләүләр күрсәтелгән квитанцияләр ала. Җыелган акчалар фондка туплана һәм соңрак йортның тузган уртак милеген торгызуга яки алыштыруга тотыла. Әмма барлык милекчеләр дә бу взносларны бер үк тәртиптә түләргә тиеш түгел. Бу турыда «Татар-информ» яза.
Күпфатирлы йортларда агымдагы һәм капиталь ремонт эшләре башкарыла, әмма аларның максаты һәм финанслау тәртибе төрле.
Агымдагы ремонт бинаны һәм аның аерым элементларын төзек хәлдә тоту өчен башкарыла. Мондый эшләр, гадәттә, милекчеләр идарәче оешмага, ТСЖ яки ТСНга даими рәвештә түләгән акчалар исәбенә башкарыла. Бу эшләргә вак-төяк җитешсезлекләрне бетерү, җиһазларга хезмәт күрсәтү һәм йортны тиешенчә файдалану өчен кирәкле башка эшләр керә.
Капиталь ремонтның күләме зуррак. Ул бинаның төп конструктив элементларын һәм инженерлык системаларын торгызуны яки алыштыруны күздә тота. Мондый эшләр кысаларында, мәсәлән, түбә тулысынча алыштырылырга, җылыту, су белән тәэмин итү һәм йортның башка гомуми коммуникацияләре ремонтланырга мөмкин.
Гадәттә, күпфатирлы йортлардагы торак һәм башка урыннарның милекчеләре капиталь ремонт өчен даими рәвештә взнос түләргә тиеш. Шул ук вакытта законда гражданнарны мондый түләүләрдән тулысынча азат итә торган яки башка сәбәпләр аркасында взнослар исәпләнми торган очраклар да каралган.
Түбәндәге милекчеләр капиталь ремонт өчен түләүдән азат ителә:
- 80 яшькә җиткән фатир милекчеләре;
- рәсми рәвештә авария хәлендә дип танылган һәм сүтелүгә тиешле күпфатирлы йортлардагы урыннарның милекчеләре;
- территорияләрне комплекслы үстерү кысаларында яңарту программасына кертелгән йортлардагы торак милекчеләре;
- дәүләт яки муниципаль ихтыяҗлар өчен тартып алына торган биналардагы фатир милекчеләре;
- Советлар Союзы Геройлары һәм Россия Федерациясе Геройлары, Хезмәт Геройлары, шулай ук Дан орденының яки Хезмәт Даны орденының барлык дәрәҗәләре белән бүләкләнгән гражданнар.
Шулай итеп, ташламага хокук бирә торган статус яки йортның махсус статусы капиталь ремонт өчен түләү бурычыннан азат ителүгә нигез булырга мөмкин.