Казанның Идел буе районы буенча Тикшерү идарәсе бүлекчәсенең элекке башлыгы кулга алынган

Казанның Идел буе районы буенча Тикшерү комитеты тикшерү бүлегенең элеккеге башлыгы Эдуард Закировны тоткарлаганнар. Бу хакта «Татар-информ» хәбәр итә.

Элегрәк билгеле булганча, ул җирле эшмәкәрдән зур ришвәт алганда тотыла. Тикшерү вакытында Закировның 400 млн сумлык милеге булуы ачыкланган. Милек арасында: 3 йорт, 2 фатир, 3 машина кую урыны, «Porsche Cayman» һәм «Jeep Grand Cherokee» машиналары.

Аның хатыны һәм әнисенең Казанда 4 фатиры, берничә кыйммәтле автомобиль, шул исәптән «Porsche Cayenne Turbo», «BMW X7» һәм «Mercedes-Benz V-class» машиналары булуы ачыкланган.

Мартта Эдуард Закировны эштән читләштерделәр, тикшерү материалларын Тикшерү комитеты башлыгы Александр Бастрыкинга тапшырдылар.