7 майда иртә белән Казанның Бауман урамында бер ир-атны кыйнаганнар һәм аягын сындырганнар. Бу турыда «Татарстан 24» каналы хәбәр итте.
Иртән-иртүк шаурмага чират торганда җәнҗал чыга. Ике ир-ат башта тавышланыша башлый, аннары таныш булмаган бер ир-атка һөҗүм итәләр.
Имгәнгән ир-ат сүзләренчә, ул дебоширларга кисәтү ясаган булган, тынычлыкка чакырган. Шуннан соң ярсынган җәнҗалчылар кисәтү ясаган кешегә ташланган. Алар бу ир-атны бик каты кыйнаган, хәтта аягын сындырганнар. Аннары качып киткәннәр.
Имгәнгән ир-атны хастаханәгә илткәннәр. Җинаятьчеләрне эзлиләр, диелә хәбәрдә.