Казанның данлыклы 18нче хастаханәсенә “прописка”сыз эләгеп буламы?
Сорауга Казан шәһәренең 18нче хастаханәсе табиб-оториноларингологы Ләйсән Азизова җавап бирә:
- Билгеле булганча, кичектергесез ашыгыч ярдәм шәһәрнең өч дәвалау учреждениесендә күрсәтелә. Болар: 12, 16,18 нче хастаханәләр. 18нче хастаханә сишәмбе көнне дежур тора һәм тәүлек әйләнәсе авыруларны кабул итеп, ярдәм күрсәтә. Безгә кемнәр эләгә ала соң? Казан пропискасы булганнарны гына түгел, шәһәрдә вакытлыча яшәүчеләрне дә, пропискасы авылда булган кешеләрне дә кабул итәбез. Шулай ук ашыгыч ярдәм машинасы алып килгән, төрле дәрәҗәдәге тән җәрәхәтләренә дучар булган пациентларны да хастаханә кире бормый. Бу очракта прописка мөһим түгел. Алар чит ил кешеләре дә, торыр урыны булмаган катлам да булырга мөмкин.
Ләйсән Азизова сүзләренчә, пациентлар хастаханәгә үзләре дә мөрәҗәгать итә ала, шулай ук аларны тар белгечләр дә юллый ала.