Казанның Дәрвишләр бистәсендәге зиратта кабергә этләр оялаган
Салкыннар башлангач, этләр каберлектә оя казыган.
Казанның Дәрвишләр бистәсендә яшәүчеләр зираттагы кабергә оялаган этләрдән зарлана. Бу турыда «Татарстан 24» каналы хәбәр итте.
Бер кабергә биш көчек оялаган.
Шаһитлар сүзләренчә, моңа кадәр сукбай этләр каберлек янында яшәгән. Хәзер этләр балалаган. Тиздән салкыннар башлана. Шуңа күрә этләр кабер ташлары астына оялар казыган.
Кешеләр туганнары каберен карарга килгәч, борчуга калган. Алар администрациягә мөрәҗәгать иткән. Тик ярдәм ала алмаганнар. Хәзер бу кешеләргә каберләрне үз хисапларына төзәтергә туры килүе ихтимал, диелә хәбәрдә.
