Казанда арендага алынган машина светофорның кызыл төсенә урам чатына килеп керә. Биредә ул җәяүлеләр кичүе аша юлны чыгып баручы ике егетне бәрдерә. Егетләр Казанга Башкортстанның Чишмә авылыннан укырга килгән. Бу турыда newsbash.ru хәбәр итте.
18 яшьлек Сәет имгәнә һәм урында ук үлә. Аның 21 яшьлек абыйсы Давид җитди имгәнә, аны хастаханәгә илткәннәр һәм ИВЛ аппаратына тоташтырганнар. Хәзер аның гомерен саклап калу өчен табиблар көрәшә, алар киләчәккә бернинди фараз да әйтми.
Егетләрне бәрдергән машина рулендә 18 яшьлек егет була. Аңа машина йөртү таныклыгын 1 ай элек кенә биргәннәр. Фаҗига булган көнне, дуслары белән йөрер өчен, каршеринг машинасы ала. Тизлекне арттырып, светофорның кызыл төсенә уза һәм җәяүлеләрне бәрдерә, аннары каршыга килә торган машинага бәрелә.
Авария шаһитлары яшь йөртүчене ваемсызлыкта һәм җавапсызлыкта гаепли. Аңа таныклык бирүчеләрне җавапка тартырга кирәк, диләр. Җинаять эше ачу мәсьәләсе хәл ителә, диелә хәбәрдә.
Сәет һәм Давидның авылдашлары бик борчыла. Аларны аналары ялгызы үстергән. Егетләр бик яхшы иде, диләр.
Әлеге авария турында «Татар-информ» агентлыгы 14 декабрьдә хәбәр иткән иде. Фаҗига кичке 8ләр тирәсендә Сибгат Хәким һәм Фатих Әмирхан урамнары чатында була.
Шәһәр буенча ЮХИДИ хәбәр иткәнчә, каршеринг белән идарә итүче 18 яшьлек егет светофорның кызыл төсенә чыга, ике җәяүлене бәрдерә. Ул машина йөртү таныклыгын 1 ай элек алган, диелә хәбәрдә.