Казан гимназиясендә укучы 11 класс укучысы үзенә кул салган
Абдулла Алиш исемендәге 20 гимназия җитәкчесе укучының үлеменең сәбәбен атады.
Казанның Совет районындагы Абдулла Алиш исемендәге № 20 татар гимназиясенең 11 класс укучысы өендә үзенә кул салган. Малайның мәетен әтисе таба. Ул бернинди хат та калдырмаган, дип хәбәр итә «Татар-информ».
Малайның үлеменә аның компьютер уеннары һәм социаль челтәрләр белән мавыгуы сәбәп булырга мөмкин, дип сөйләгән «Татарстан24» каналына мәктәп директоры Рәхимә Арсланова. Аның социаль челтәрләрдәге аккаунтында уеннардан күп кенә фотолар табылган.
Директор әйтүенчә, укучы яхшы гаиләдән. Конфликтларга кермәгән, «без үзебез шок хәлендә» ди, җитәкче. Директор компьютер уеннарын гаепли. Директор әйтүенчә, хәзерге уку процессы компьютерда күп шөгыльләнүне таләп итә. Әмма бу очракта сүз «артык күп шөгыльләнү» турында бара. Укучыларга компьютер уеннарында уйнауны чикләргә, ә ата-аналарга балаларының Интернетта нәрсә карауларын тикшерергә кирәк, алар белән сөйләшергә кирәк, ди директор.
Полицейскийлар малайның ни сәбәпле үзенә кул салганын тикшерә. Ул тыныч һәм тыйнак, үз эченә бикләнгән булган, яхшы билгеләренә укыган.
Малай хокук буенча БДИ бирергә тиеш булган.