Казандагы балалар бакчасында ике яшьлек бала үлгән: көндезге йокыга яткан... һәм тормаган

Казандагы Яңа Савин районының Октябрь урамында урнашкан 315нче балалар бакчасында 2 яшьлек кыз бала үлгән. Бу хакта телеграм-каналларда мәгълүмат таралган, Казан мәгариф идарәсе бу фаҗигане раслады.

21 декабрьдән 10 гыйнварга кадәр кыз, ОРВИ белән авырып, хастаханәдә ята. 12 гыйнварда бакчага килә. Көндез ул үзен гадәти тота – кәефе начар булганга зарланмый, тәрбиячеләр ниндидер сәерлекләр күрми. Төшке йокыга кадәр бакчада планлаштырылган табиб тикшерүе була, табиб та бу баланың сәламәтлегендә тайпылышлар күрми.

SHOT язуынча, бала егылган һәм үлгән. Әмма мәгариф идарәсе вакыйгаларның бүтәнчәрәк булганын яза.

Балаларны көндезге йокыга яткыралар. Тәрбияче балаларның тәртип бозмауларын тикшереп торган. Йокы сәгате узганнан соң, ул балаларны уята башлый, әмма бу бала тормый. Ул мөдиргә хәбәр итә, анысы исә «ашыгыч ярдәм» чакыра. Алар тиз килеп җиткән, бала инде үлгән була.

Мәгариф идарәсе кайгы уртаклашу сүзләрен җиткергән. «Бу – гаилә өчен зур кайгы һәм фаҗига», – диелгән хәбәрдә.