Кичә Казанда югалган 12 яшьлек кыз баланың кайда булуы ачыкланды. Бу турыда «Татарстан 24» каналы хәбәр итте.
- Казанда бер тәүлеккә якын элек югалган 12 яшьлек кыз баланы эзлиләр, дип язган идек.
Кичә кич белән кыз апасы белән талашкан да диван артына кереп яткан. Ул бераз елаган һәм шунда йокыга киткән. Бу вакытта – узган төндә һәм бүген көндез – баланы борчуга калган туганнары һәм волонтерлар эзләде.
Соңрак ачыкланганча, кыз уянган вакытта, өйдә беркем дә булмаган. Ул урамга чыккан, һәм аны шул чакта туганнары очраткан.
Соңгы 2 көндә Казанда 5 баланы эзләделәр. 26 октябрьдә төнлә 3 бала югалу турында хәбәр килә. Тагын 2 бала 27 октябрьдә югала. Балигъ булмаган балаларның югалуы турында әти-әниләре әйтә. Хәзерге вакытта алар барысы да исән-сау килеш табылды, диелә хәбәрдә.