Казанда төзелә торган яңа тикшерү изоляторының (СИЗО) яңа бинасында 1 кешелек, 2 кешелек һәм 4 кешелек камералар булачак. Һәр камерада 2 катлы тимер караватлар, унитаз өчен аерым кечкенә кабина, юынгыч, өстәл, урындыклар, суыткыч һәм радио урнаштырылачак. Телевизорлар өчен дә урын каралган – әлегә аларга кронштейннар гына куелган. Бу турыда «Татар-информ» яза.
Тәрәзәләр махсус җайланмалар белән җиһазландырылган – тоткыннар аларны үзләре ача алачак, ләкин тышка берни дә ыргыту мөмкин түгел. Шулай ук вентиляция системасы, ут приборлары һәм видеокамералар да рәшәткәләр белән сакланган. Монда күзәтү камералары өчен «сукыр зоналар» бөтенләй юк.
Моннан тыш, һәр камерада махсус элемтә төймәләре урнаштырылган – әгәр тоткын хезмәткәрне чакырырга теләсә, шул төймәгә баса алачак.
Хатын-кызлар корпусы өчен аерым камералар каралган – балалар белән булган аналар өчен. Канун буенча, хатын-кыз баласы белән 3 яшь тулганчы изоляторда бергә була ала. Мондый камералар башкаларга караганда уңайлырак итеп җиһазланган: саклау өчен өстәмә тартмалар, киштәләр, баланы төрә торган өстәл һәм бала караваты бар. Монда бәдрәфтә ут хәрәкәт датчигы ярдәмендә автомат рәвештә кабына.
Прогулкалар өчен барлыгы 8 мәйданчык каралган: берсе – балалар өчен, берсе – зур спорт мәйданчыгы (турниклар, тренажерлар һәм баскетбол боҗрасы белән), ә калганнары – гадәти йөрү өчен билгеләнгән урыннар.