Казанда унлап ир-атның кувалдалар белән сугышуының сәбәбе билгеле
Бер төркем икенче төркемнән тәмәке сораган булган.
Казанның Җиңү проспектындагы йортларның берсенең ишегалдында унлап ир-ат кувалдалар белән сугышкан. Россия Эчке эшләр министрлыгының Татарстан буенча идарәсе әлеге вакыйга турында аңлатма бирде. Бу турыда «Татарстан 24» каналы хәбәр итте.
Ведомство белешмәсе буенча, сугыш урынына тикшерү төркеме килә. Полиция хезмәткәрләре сугышучыларны ачыклый һәм тоткарлый. Бу — Казанда яшәүче ир-атлар, аларга 21-31 яшь.
«Ачыкланганча, тоткарланган ир-атлар зыян күрүче ир-атлардан тәмәке сораган. Тәмәке бирүче булмагач, алар әйткәләшә башлый, аннары сугыша тотыналар», — диелә ведомство хәбәрендә.
Өч ир-атка карата «җәмәгать урынында исерек килеш йөрү», тагын берсенә карата «полиция хезмәткәренең боерыгына буйсынмау» маддәсе буенча протокол төзелгән, диелә хәбәрдә.
