Казанда унлап ир-ат кувалдалар белән сугышкан
Ир-атлар төрле эштә эшләүчеләр, сугыш булган кичтә чираттагы объектны демонтажлап кайтканнар.
Казанның Җиңү проспектындагы йортларның берсенең ишегалдында унлап ир-ат сугышкан. Аларның кайсыберләренең кулларында кувалдалар булган. Бу турыда «Татарстан 24» каналы хәбәр итте.
Шаһитлар полициягә хәбәр иткән. Хокук саклаучылар килгәндә ир-атларның бер төркеме генә калган, калганнары качып киткән. Бу төркем сугышта үзен гаепле түгел дип саный. Алар саклануларын, зыян күрүче як булуларын әйтә.
Бу ир-атлар төрле эштә эшләүчеләр, сугыш булган кичтә чираттагы объектны демонтажлап кайтканнар. Шуңа күрә машинада үзләре белән эш кораллары, шул исәптән кувалдалар да булган.
Сугышта катнашкан икенче төркем качып китсә дә, аларны тиз арада эзләп тапканнар. Бу төркем исә үзләренең исерек булуын, беркемгә дә агрессия белдермәүләрен әйтә. Ир-атларның берсенең кесәсендә патрон табылган. Алар бу патронны сугышка кадәр, урамда очраклы гына таптык дип белдерә.
Сугышучыларның берсенең башы имгәнгән, аны хастаханәгә озатканнар.
Тикшерү эшләре бара, диелә хәбәрдә.