Казанда тугыз катлы йорт биеклегендә кайнар су фонтаны барлыкка килгән
Шаһитлар гадәттән тыш хәлне видеога төшереп алган.
Казанның Айдаров урамында урнашкан 7нче йорт ишегалдында кайнар су фонтаны бәреп чыккан. Бу хәл турында «Татар-информ» агентлыгына шаһитлар хәбәр итте.
Шаһитлар сүзләренчә, кайнар су фонтаны йортның тугызынчы катына кадәр җиткән.
Казан җылылык челтәре мәгълүматы буенча, бу фонтан торбаларны планлы опрессовкалау нәтиҗәсендә барлыкка килгән. Борчуга калган шәһәр халкы Казан җылылык челтәренең телефоннарына шалтырата тотынган.
«Хәзер планлы опрессовкалау эшләре бара. Кайнар суның температурасы 30 градус чамасы тәшкил итә, аның белән пешү мөмкин түгел. Айдаров урамындагы участок койма белән чикләнгән, эшләр тукталды», — дип аңлаттылар агентлыкка Казан җылылык челтәрендә.
