Казанда бер ир-ат әнисе белән үги атасына пычак белән һөҗүм иткән. Ул төрмәдән чыгуы хөрмәтенә ныклап бәйрәм ясагач, кабат җинаять кылган. Бу турыда РЕН ТВ хәбәр итте.
33 яшьлек ир-ат әле 2 көн элек кенә иреккә чыккан. Ул әнисе һәм үги атасы яши торган фатирга килә. Гаилә бергәләп бәйрәм кора. Бераз салып утырганнан соң, төрмәдән кайткан улы ярсый һәм пычакка ябыша.
«Үги атасына һөҗүм итә, аны чәнчеп бетерә, аннары анасы артыннан подъездга йөгереп чыга, аның корсагына кадый», – дигән РЕН ТВ чыганагы.
Яраланган хатын-кыз урында ук үлә. Ир-атны хастаханәгә китерәләр, ул критик хәлдә, аның гомере өчен табиблар көрәшә.
Җинаятьче тоткарланган, диелә хәбәрдә.
«Татар-информ» белешмәсе буенча, фаҗига «Салават күпере» торак комплексында Нурихан Фәттах урамында була. Ир-ат әнисенә подъездда берничә тапкыр пычак кадаган, аннары канлы пычагы белән лифтта йөргән, аннары кабат әнисе янына менгән һәм кабат кадап үтергән.
Мәрхүмә хатынга 56 яшь, аның яраланган иренә 53 яшь.