Казанда салкында машина көткәндә кулларын өшеткән ир-атның бармакларын кискәннәр
Башта аның бармаклары каралып килгән.
Казанда салкында кулларын өшеткән ир-атның бармакларын ампутацияләгәннәр. Бу турыда «Татарстан 24» каналы хәбәр итте.
Әлеге ир-ат урамда машина көтеп озак басып торган. Аның бармакларында сулы куыклар барлыкка килгән, аннары алар каралган. Табибларга бармакларны кисеп алырга туры килгән.
Яңа ел каникулы вакытында ашыгыч ярдәм табиблары 6340 тапкыр чакыруга барган. Өшү очраклары 47 тапкыр теркәлгән.
Табиблар салкын вакытта күп катлы итеп киенергә, урамга чыгар алдыннан алкоголь кулланмаска киңәш итә.
«Киемнәр коры, күп катлы булырга, суларга тиеш. Алкоголь кулланмагыз», — ди ашыгыч ярдәм станциясендә оператив бүлек җитәкчесе Максим Кузнецов.
