Казанның Гагарин урамында билгесез кеше күпкатлы йортның дүртенче катыннан тәрәзәдән мәчеләр ыргыткан. Бу турыда «Татарстан 24» шаһитларга сылтама белән хәбәр итте.
Шаһитлар полициягә мөрәҗәгать иткән, әмма хокук сакчылары фатирга керә алмаган.
Урамда яткан хайваннарны волонтерлар тапкан. Мәчеләрнең сынган урыннары, гематомалары, тәпиләрендә һәм тырнакларында җәрәхәтләр, шулай ук тәпи аслары зарарланган булуы ачыкланган.
«Менә бу мәченең уң як арткы тәпие сынган, борынында кан бар. Ә тегендә, машина астында, тагын берсе утыра», — диелә шаһитлар төшергән видеода.
Ике җирән мәчене волонтерлар инде коткарган. Хәзер алар белгечләр күзәтүендә клиникада тора. Өченче — соры мәчене әлегә таба алмаганнар.
Йортта яшәүчеләр сүзләренә караганда, хайваннар ташланган дип фаразланган фатирда күп мәче асраучы хатын-кыз яши. Әмма шаһитлар йорт хайваннарын билгесез ир-ат ташлаган дип әйтә.
Бу хәлдән соң күршеләр хайваннар өчен генә түгел, күптән күренмәгән әлеге хатын-кыз өчен дә борчыла башлаган.