Казанда лифт ремонтлаганда бер ир-ат һәлак булган. Ремонтлау слесаре лифт астында калган. Бу турыда «Татар-информ» Россия Тикшерү комитетының Татарстан буенча Тикшерү идарәсенә сылтама белән хәбәр итте.
Фаҗига Петр Полушкин урамындагы йортларның берсендә була. Ир-ат лифт шахтасына керә. Шул чакта лифт икенче каттан төшә башлый, ир-ат аста кысылып кала. Ул имгәнә һәм урында ук үлә.
Якынча белешмә буенча, иминлек таләпләрен үтәмәгәннәр. Ир-ат шахтага төшә, лифтны тотып тора торган төймәне дә ычкындыра. Шул чакта лифт хәрәкәткә килә.
Тикшерү эшләре бара, диелә хәбәрдә.