Узган төндә Казанның Горький шоссесында юл һәлакәтендә 3 кеше үлгән. Бу турыда «Татар-информ» яза.
Төнлә 21 яшьлек кыз идарә иткән Honda фонарь баганасына, аннары бетон терәккә бәрелә. Салонда 3 пассажир һәлак була. Машина йөртүче медицина ярдәменнән баш тарткан.
Казан Дәүләт автоинспекциясе белешмәсе буенча, мәрхүмнәр – барысы да ир-атлар, аларның икесенең яше билгеле: берсенә 30, икенчесенә 31 яшь.
Җинаять эше ачылган.
Иртән агентлык хәбәрчесе фаҗига урынында булган. Кадрларда мәрхүмнәрнең шәхси әйберләре, кием кисәкләре, хатын-кыз сумкасы күренә.
Бетон баганада кан таплары бар, тирә-якта автомобиль запчастьләре ята.