Казанда коронавируслы ана тапкан, тумыштан пневмонияле игезәкләр хастаханәдән чыкты
Йөкле хатынны май башында ук республика клиник хастаханәсенә салганнар, ул тудырган балаларның үпкәләре ялкынсынган була.
Татарстанның Республика клиник хастаханәсе табиблары коронавирус инфекциясе белән авырган хатын-кызны һәм тумыштан пневмония белән дөньяга килгән аның игезәк балаларын дәвалаган. Республика клиник хастаханәсенә Казанда яшәүче йөкле ханым май башында ук китерелгән. Бер айдан соң аны һәм сабыйларны исән-имин өйгә чыгарганнар. Бу турыда Татарстан Сәламәтлек саклау министрлыгының матбугат хезмәте хәбәр итте.
Казанда яшәүче 27 яшьлек йөкле хатын-кыз коронавирус йоктыра. Аны республика клиник хастаханәсенә китерәләр. Биредә ул йөклелекнең 34нче атнасында 1800 грамм авырлыктагы ике кыз бала тудыра. Сабыйларга тумыштан пневмония диагнозы куялар. Бу турыда «Татар-информ» агентлыгы язган иде.
Балаларны шунда ук республика клиник хастаханәсенең Перинаталь үзәгенең яңа туган балаларны реанимацияләү бүлегенә урнаштырганнар. Берничә көннән соң аларны бүлеккә күчерәләр. Озакламыйча сабыйларны һәм әнине исән-имин өйгә чыгаралар. Covid-19га тестының нәтиҗәләре өчесендә дә тискәре күрсәткән, диелә министрлык хәбәрендә.