Казанда карт әбине үз кызы подъездда читлеккә ябып тоткан
77 яшьлек хатын быел җәй буе подъезддагы тамбурда яшәгән.
Казанда яшәүче хатын карт анасын озак вакыт дәвамында сусыз һәм ризыксыз подъездда тоткан. Бу турыда социаль челтәрләрдә Юлия Хәкимова язган. «Татарстан 24» каналы шул хакта хәбәр итте.
«Сусыз, ризыксыз, бәдрәфсез килеш ул көннәр буена утырды, күршеләре яныннан узып йөрде, кешеләр инде, тик берсе берни эшләмәде», — ди ул.
Юлия Хәкимова эшли торган үзәк әлеге вакыйга турында белеп алгач, бирегә халыкка социаль хезмәт күрсәтү оешмасы вәкилләр килә, тик аларга озак вакыт беркем дә ишек ачмый.
Аннары пенсионер хатынны тамбурдан коткаралар, хастаханәгә салалар. Хәзер җәмәгать эшлеклеләре аның кызын җәзага тартуны таләп итә.
Соңрак ачыкланганча, 77 яшьлек карчык быел җәйдән үк подъезддагы тамбурда яши.
«Татарстан 24» каналы хәбәрчесе күршеләр белән аралашкан. Аларның сүзләренчә, күршеләр әбинең кызы белән дә, кияве белән дә сөйләшеп караган. Әбине мыскыл итүдән туктауны үтенгәннәр. Ләкин бу сүзләр файда бирмәгән. Аннары күршеләр социаль хезмәткәрләргә мөрәҗәгать иткән.
Күршеләре сүзләренчә, башта әби үзен-үзе карап тора, ләкин аннары инсульт була. Шуннан соң кызы белән кияве әбинең башка йорттагы үзенең фатирын сата һәм әбине аннан күчерәләр. Бу белешмә әлегә рәсми рәвештә расланмаган, диелә хәбәрдә.