Кичә кич Казанның Әмәт магистралендә «Chery» каршеринг автомобиле басып торган фурага бәрелгән. Бу юл-транспорт һәлакәтендә 17 яшьлек пассажир кызның гомере өзелгән.
Һәлакәт кичке сәгать 7ләр тирәсендә була. Дәүләт автоинспекциясе вәкилләре хәбәр иткәнчә, машина руле артында Мәскәүдән килгән, машина йөртү хокукыннан мәхрүм ителгән 19 яшьлек егет булган. Ул тизлек режимын һәм юл кагыйдәләрен үтәмәгән. Нәтиҗәдә, туктап торган «КамАЗ»га килеп бәрелгән. Аннан «Chery» машинасы читкә оча һәм хәрәкәт иткән «Hyundai» автомобиленә килеп бәрелә. Машинаның арткы өлешенә зур зыян килгән.
Кыз авария урынында ук үлгән. Шулай ук «Chery» машинасындагы 16 яшьлек пассажир да җитди имгәнә. Аны хастаханәгә алып киткәннәр.
Каршеринг йөртүчесе машина белән чит кеше аккаунтыннан идарә иткән. Бу аккаунт аның Казандагы танышыныкы булган. Әлеге авария буенча җинаять эше ачылган, дип хәбәр итә, Дәүләт автомобиль инспекциясенә сылтама белән, «Татар-инофрм».
