Казанда ир белән хатын җиһазларны ватып талашканда фатирга ут капкан
Күршеләре фикеренчә, ир я хатын махсус рәвештә йорт җиһазларына ут төрткән.
Казанның Ленская урамындагы күпкатлы йортларның берсендә янгын чыккан. Бу турыда «Татарстан24» телеканалы хәбәр итте.
Күршеләр төтен исен сизеп, янгын сүндерүчеләрне чакыра. Коткаручылар фатирга керә. Анда янгын сүндереп маташучы ике кеше була. Фатирда йорт җиһазлары янып ята.
Коткаручылар янгын электр үткәргеченнән чыккан дип фаразлый.
Тик күршеләр бу версияне кире кага. Аларның сүзләренчә, янгынга кадәр фатирда тавыш була. Ир белән хатын кычкырышып талаша, бүлмәләрдәге җиһазларны җимерә,
Хуҗалар исә коткаручыларга аермачык кына итеп янгын сәбәбен әйтә алмаган. Хәзер моны ачыклау белән тикшерүчеләр шөгыльләнә. Ир белән хатынны участковый сораштыра.