Казанда ике егет кибеттәге терминалны күтәреп алып киткән
Алар акчаны алган да терминалны гаражлар янында ташлап калдырган.
Казанда Гадел Кутуй урамындагы бер кибеттән түләү терминалын урлаганнар. Ике егет терминалны күтәреп алып чыгып киткән. Бу турыда Татарстан буенча Эчке эшләр министрлыгының матбугат хезмәте хәбәр итте.
Соңрак ачыкланганча, 13 августта иртәнге дүрт тирәсендә ике егет азык-төлек кибетенең тамбурына керә. Алар банкоматны кулларына күтәрә һәм урамга алып чыга. Караклар банкоматны машинага салып алып китә.
Җинаятьчеләр 200 мең сум чамасы зыян китергән. Бу — 29800 сум терминал бәясе һәм терминалда булган 170 мең сум чамасы акча.
Полиция хезмәткәрләре видеокүзәтү камерасы язмаларын өйрәнәләр. Алар каракларның автомобилен ачыклый, аннары аларның шәхесләре дә билгеле була. Бу Казанда яшәүче 22 һәм 26 яшьлек ике егет булып чыга. Алар терминалны ватып ачкач, бөтен акчаны. буш терминалны исә гаражлар янына илтеп ыргыталар.
Каракларга карата «урлау» маддәсе буенча җинаять эше ачылган. Егетләрнең берсен сак астына алганнар, икенчесе өй сагында тора.