Казанда халык санын алып йөрүче хатынны баскычтан төртеп төшергәннәр
Биредә яшәүче ир-ат фатирлар буйлап җанисәпне язып йөрүче хатынны төртеп еккан, аягыннан сөйрәп подъезддан чыгарып аткан.
28 октябрьдә кич белән Казанның Кутузов урамындагы 17 йорт подъездында халык санын алырга килгән хатынга һөҗүм иткәннәр. Биредә яшәүче ир-ат бу хатынны подъезддан куып чыгара башлаган, хатын китәргә дип борылгач, артыннан төртеп җибәргән. Бу турыда «Татарстан 24» каналы хәбәр итте.
«Сукканнан соң, хатын егыла һәм баскычтан тәгәрәп төшеп китә. Ир-ат хатынны төрткәләвен дәвам итә һәм аягыннан сөйрәп подъезддан чыгара», — дип аңлатканнар шәһәр буенча Эчке эшләр министрлыгы идарәсенең матбугат хезмәтендә.
Имгәнгән хатынны йорт яныннан хастаханәгә алып киткәннәр. Суд-мед экспертиза билгеләнгән.
Ир-атны хокук саклаучылар тоткарлаган.
Күршеләре сүзләренчә, ул гаражда этләр асрый, аларны ашатып тора, кичләрен йөртергә алып чыга.
«Бу кеше әйләнә-тирәдәгеләр өчен куркынычка әверелеп бара. Аның җәзасызлык хисе барлыкка килгән инде», — ди биредә яшәүче Светлана.
