Казанда Finiko финанс оешмасына нигез салучы Кирилл Доронин тоткарланган
Былтыр декабрь аенда «Финанс пирамидасы оештыру» маддәсе буенча җинаять эше ачылган иде.
«Татар-инофрм» агентлыгы үз чыганакларына сылтама белән хәбәр иткәнчә, Казанда Finiko финанс оешмасына нигез салучы Кирилл Доронин тоткарланган.
Татарстан буенча Эчке эшләр министрлыгының Икътисади иминлек һәм ришвәтчелеккә каршы тору идарәсе оперативниклары аны бүген көннең беренче яртысында тоткан.
Агентлык белешмәсе буенча, Кирилл Доронинны Эчке эшләр министрлыгының Баш тикшерү идарәсенең Губкин урамында урнашкан бинасына сорау алуга чакырганнар, шунда аны тоткарлаганнар.
Былтыр декабрь аенда «Финанс пирамидасы оештыру» маддәсе буенча җинаять эше ачылган иде. Компания офисларында тентүләр булды.
Июль уртасында Finiko кертемчеләре акчаларын шәхси кабинет аша чыгара алмавы ачыкланды. Кулланучылар аккаунтларына керә алмады. Бер атнадан соң хокук саклаучыларга кертемчеләрдән шикаятьләр килә башлады, диелә бу хәбәрдә.