Узган шимбәдә Казанның Зорге урамындагы барларның берсендә егермеләп кеше күмәкләшеп сугышкан. Бу турыда «Татарстан 24» каналы хәбәр итте.
Кич белән соң гына бирегә берничә экипаж белән полиция хезмәткәрләре килә. Тик сугышучыларның бер өлеше качып китәргә өлгерә.
Сугышта катнашкан ир-ат сүзләренчә, аңа берьюлы берничә кеше һөҗүм иткән. Аннары аның дуслары да сугышка кушылган. Бар хуҗасы аларны аерырга маташкан. Шул чакта аның үзенә дә эләккән.
Шулай да хуҗа кеше бу хәлгә, көн дә була торган, гадәти вакыйга дип карый, шаяртмакчы була, диелә хәбәрдә.
Күмәк сугышта катнашучылар полиция килгәнче үк татуланышкан, беркем дә, гариза язып, бер-берсен җинаять җаваплылыгына тартырга теләмәгән.
Полиция килгәнче, каршы төркем качып өлгергән. Барда утырган башка кунакларның дәгъвасы булса гына, бу кешеләрне полиция эзләячәк.
Сугышта катнашучыларның калганнары исә, киемнәрендә кан таплары булуга карамастан, кичәне дәвам иткән, диелә хәбәрдә.