Казанда бер ир ап-аек килеш хатынын металл торба белән кыйнаган

Казанның Губкин урамындагы бер йорттагы фатирда ир белән хатын талашкан. Әлеге вакыйга турында "Татарстан24" телеканалы хәбәр итте.

Ир белән хатын башта бер-берсен  сүзләр белән генә кимсеткән. Шуннан соң, ир сугышырга тотынган. Ул металл торба алган һәм хатынын кыйнаган. Торба белән хатынының башына берничә тапкыр суккан. Хатын шунда ук, аңын югалтып, идәнгә егылган.

Бераздан ир, аңына килеп, ни эшләп ташлаганын күреп алган. Ул үзе «ашыгыч ярдәм» чакырган. Җитди имгәнгән хатынны 7нче хастаханәгә алып киткәннәр.

Талаш вакытында ир дә, хатын да ап-аек булган. Бу иргә җәза хатынның сәламәтлегенә карап билгеләнәчәк, диелгән әлеге хәбәрдә.