Казанда белем алган, танылган җырчы фаҗигале һәлак булган
Петродворец — Кейкино юлында Peugeot Boxer микроавтобусы артист утырган Datsun җиңел машинасына бәрелә.
Петербург янында юл һәлакәтендә танылган опера җырчысы Римма Волкова үлгән. Бу турыда Римский-Корсаков исемендәге музыка мәктәбенә сылтама белән РИА Новости яза.
«Ул укучыларын яратты, эшенә ихлас бирелгән иде, озак еллар вокал бүлеген җитәкләде, бик яхшы укучылар тәрбияләде», диелә хәбәрдә.
Бишенче канал белешмәсе буенча, авария якшәмбе кич Петродворец — Кейкино юлында була. Peugeot Boxer микроавтобусы Datsun җиңел машинасына бәрелә. Җиңел машинада 80 яшьлек артист һәм тагын ике кеше була.
Эчке эшләр министрлыгы белешмәсе буенча, авария Ломоносов районында кичке алтынчы яртыда була. Peugeot Boxer каршы як полосага чыга һәм Datsun машинасына бәрелә. Җиңел машинада 80 яшьлек Римма Волкова һәм 61 яшьлек ир-ат һәлак була. 59 яшьлек хатын имгәнә, аны хастаханәгә салганнар, ул авыр хәлдә. Peugeot йөртүчесе дә имгәнгән, аны хастаханәгә озатканнар.
Римма Волкова Ашхабадта туган. Ставрополь училищесында музыкаль белем алгач, Казан консерваториясенә керә. Аннары Киров театрында эшли.
1995 елда Россиянең халык артисты исеме бирелә. Аннары Римский-Корсаков исемендәге музыка мәктәбендә укыта башлый һәм вокал бүлеген җитәкли.