Җиңү көнендә Казанда тантаналы парад, «Үлемсез полк» акциясе һәм бәйрәм салюты көтелә. Бәйрәм чаралары турында Казан башкарма комитеты җитәкчесе урынбасары Азат Авзалов сөйләде.
Аның сүзләренчә, ел саен алдан ук Җиңү паркында чәчәкләр салу була. Мәктәп музейларында Бөек Ватан сугышы һәм махсус операциядә катнашучылар хөрмәтенә экспозицияләр яңартылган. 8 майда Казанда ел саен уздырыла торган «Ветеран йорты янында парад» акциясе үткәреләчәк, урамнардан һәм мәйданнардан тарихи техника узачак, ветераннар йортлары янында тукталачак.
«9 майда чаралар Җиңү Паркында, Архангел һәм Арча зиратларында хәрбиләр каберлекләренә һәм хезмәт даны мемориалларына чәчәкләр һәм веноклар салудан башланачак. Алга таба Меңьеллык мәйданында Казан гарнизоны гаскәрләренең тантаналы йөреше уза. Бу чара хәрби техниканың (тарихи һәм заманча үрнәкләрнең) статик күргәзмәсе һәм патриотик юнәлештәге иҗтимагый оешмалар экспозициясе белән үрелеп барачак», – дип сөйләде Азат Авзалов.
Җиңү көнендә хәрби техника күргәзмәсе көн буе дәвам итәчәк. Азат Авзалов Казан халкын һәм кунакларны бәйрәмгә хайваннарсыз, зур әйберләрсез һәм самокатларсыз, шулай ук уңайлы кием киеп килергә өндәде.
«Казан гарнизоны гаскәрләре узганнан соң, Татарстан халкының Бөек Җиңүгә керткән өлешенә багышланган зур театраль тамаша күрсәтелә. Парадта Татарстанның хезмәт батырлыгы оешмаларының барлык вәкилләре дә катнашачак», – диде ул.
Бу көнне, шулай ук, «Үлемсез полк» йөреше була. Ул «Волга-Волга», Салават Фәтхетдинов һәм башка танылган артистлар катнашында «Җырлый торган Казан» акциясе белән төгәлләнә.
«Бу көнне Бауман урамында 81 ел элек оештырылган Җиңү көнен бәйрәм итүнең реконструкциясе оештырылачак», – диде Азат Авзалов.
Бәйрәм 22:00 сәгатьтә салют белән төгәлләнә, аны Казансу акваториясенең алты ноктасында аттырачаклар.
«Салютны яр буйларыннан карарга уңайлы булачак. Ул төгәлләнгәч, махсус җәмәгать транспорты оештырылачак. Барыгызны да җәмәгать транспортыннан файдаланырга чакырабыз», – дип йомгаклады Азат Авзалов.
Чыганак: «Татар-информ», Наталья Рыбакова