Казанда 41 яшьлек ир-ат күпкатлы йортның вентиляция шахтасына егылып төшеп һәлак булган
16 май көнне Казанның Әпсәләмов урамындагы күпкатлы йортта 41 яшьлек ир-ат техник 9нчы катка менгәч, 50*20 см зурлыктагы вентиляция шахтасына егылып төшкән. Бу хакта «Татар-информ» хәбәр итә.
Россия Гадәттән тыш хәлләр министрлыгының ТР буенча Баш идарәсендә хәбәр итүләренчә, ир-ат шунда ук һәлак булган.
Коткаручылар ир-атның мәетен 1нче катта тапкан. Йортта урнашкан кием кибете хуҗасыннан диварны демонтажлау өчен ризалык алынганнан соң, коткаручылар перфоратор, кувалда һәм зубила белән бетон диварны җимерә, металл арматураны алып ташлый һәм 41 яшьлек ир-атның мәетен чыгара.
Үлем сәбәбен экспертлар ачыклаячак.
