Казанда 12 яшьлек малай үги атасының машинасына иптәшләрен утырып чыгып киткән
Машина әйләнеп каплангач, салондагы кызлар имгәнгән.
Казанның Привокзальная урамында «ВАЗ-2107» машинасы әйләнеп капланган. Автомобиль белән 2008 елда туган малай идарә иткән. Авариядән соң ул урыннан качып киткән. Бу турыда Татарстан буенча Эчке эшләр министрлыгының матбугат хезмәте хәбәр итте.
Авариягә очраган «ВАЗ-2107» машинасы салонында 14 яшьлек ике кыз да була. Аларның баш мие селкенгән, кызларны хастаханәгә озатканнар. Машина бәрелгәндә алар арткы утыргычта утыра, иминлек каешын да эләктермиләр.
Соңрак ачыкланганча, үсмер малай әнисе белән яши торган ир-атның машинасын урлый. Ул акрын гына машина ачкычларын ала һәм туган сеңлесен, дусларын утыртып алып чыгып китә.
Авариядән соң, үсмер урыннан кача, тик аны хокук саклаучылар эзләп таба. Үсмерне әнисе белән бергә полиция бүлегенә алып киләләр.
Малайның анасын балигъ булмаган баланы тәрбияләү буенча вазифаларын үтәмәгән өчен җаваплылыкка тарталар. Гаилә махсус хисапта торуы ачыклана, малай үзе дә мәктәптәге хисапта теркәлгән.
Татарстан буенча Эчке эшләр министрлыгы әти-әниләрне балаларының иминлегенә җаваплы карарга чакыра. Балагыз кайда һәм нишләп йөргәнен белергә кирәк, диелә хәбәрдә.