Казан үзәгендәге кибет парковкасында атлар өчен урын ясаганнар
Социаль челтәр кулланучылар бу урынның кемнәр өчен оештырылуы турында баш вата.
Казанның Үзәк универсаль кибете (ЦУМ) янындагы парковкада ат башы сурәтләнгән парковка урыны барлыкка килгән. Бу турыда «Татар-информ» агентлыгы хәбәр итте.
Социаль челтәрләрдә таралган фото күпләрне баш ватарга мәҗбүр иткән. Алар бу урынга кем тукталырга тиеш икәнен аңлый алмый.
Агентлык бу сорауны сәүдә үзәге администрациясенә биргән. Ләкин анда бу турыда аңлатма бирүдән баш тартканнар.
Моңа кадәр ЦУМ янында Россиядә беренче булып хатын-кызлар өчен парковка урыны ясаганнар иде. Тик бу урынны тиз арада бетерделәр, диелә әлеге хәбәрдә.
