Казан җырчысы самокаттан егылып, умрау сөяген, берничә кабыргасын сындырган
«Волга-Волга» вокаль-инструменталь ансамбле Новгород шәһәрендә яр буйлап самокатта йөргәндә, фаҗига килеп чыга.
Казанның «Волга-Волга» вокаль-инструменталь ансамбле солисты Антон Салакаев хастаханәдә ята. Ул самокатта йөргәндә егылып умрау сөяген, берничә кабыргасын сындырган. Салакаевка бүген Республика клиник хастаханәсендә операция ясаганнар. Бу турыда «Татар-информ» клиниканың матбугат хезмәтенә сылтама белән хәбәр итте.
Музыкант хезмәттәшләре белән бергә Новгород шәһәрендә яр буйлап самокатта йөри. шул чакта ул егыла.
«Беркайчан да йөргәнем булмады, дуслар тәкъдим итте. „Әйдә, йөреп карыйм“, дип уйладым. Менә хәзер монда ятам инде», — ди Антон Салакаев.
Музыкантның умрау сөяге, берничә кабыргасы сынган, сеңере өзелгән. Аңа РКБ № 2 хастаханәсенең травматолог-ортопедлары операция ясаган. Җырчының хәле канәгатьләнерлек дип бәяләнә.
