Казан урамында хатынын типкәләп кыйнаган пистолетлы ир кеше бернинди дә җәза алмаячак

Казанның Павлюхин урамында травматик пистолет тоткан ир хатынын «ашыгыч ярдәм» машинасыннан өстерәп алган. «Ашыгыч ярдәм» табибларын хатынның ата-анасы чакырткан булган.

Хатын ирен әти-әнисенең юбилеена – 25 ел бергә яшәүләрен бәйрәм итәргә чакырган. Башта күңелле генә утыралар, тәмле ашыйлар, эчәләр. Градус арткач, яшьләр талаша башлый, ишегалдына чыгып китәләр, дип яза «Иптәш» каналы.

Сүзгә сүз килеп, эләгешеп китәләр. Ире хатынын чәченнән сөйрәп йөри башлый, башына суга. Кулы белән кыйный, тибә. Хатыны җиргә егылгач та туктамый.

Егет «ашыгыч ярдәм» табибларына пистолет белән янагач, тегеләр каршы килми, зыян күрүчене кире бирәләр. Соңрак гаилә бәйрәменә полиция дә килә. Кыйнаучы ир административ җәза да, җинаять җәзасы да алмаячак: аңа карата беркемдә дә дәгъва юк икән.