Казан урамында квадроцикллар трюклар ясап йөргән — видео
Шәһәр урамыннан җилдергән егетләр хәзер штраф түләячәк.
Татарстан башкаласы урамнарында квадроциклларда йөрүчеләр сурәтләнгән видео социаль челтәрләрдә таралды. Аларның шәхесләрен полиция хезмәткәрләре ачыклаган. Бу турыда «Татар-информ» агентлыгына Татарстан буенча Эчке эшләр министрлыгында сөйләделәр.
Видео кадрларында өч ир-ат сурәтләнгән. Алар квадроциклда узыш оештырган. Квадроцикллар башка машиналар арасыннан хәрәкәт итә, алар ике тәгәрмәченә генә басып күтәрелә, төрле трюклар ясыйлар.
Полиция хезмәткәрләре кадрда кайсы урын сурәтләнүен һәм бу техника чарасының хуҗаларын ачыклаган.
Урамда җилдерергә яратучы егетләргә карата протокол төзеп, шттраф салганнар. Юл йөрү кагыйдәләрен бозган өчен алар 1500 сум штраф түләргә тиеш.
