Казан мәктәбендә укучы балалар белән бергәләп тәмәке тартып, аракы эчеп йөргән укытучыны эштән куганнар. Бу турыда «Татарстан 24» каналы хәбәр итте.
Моңа кадәр Казанның Вахитов районындагы 41нче мәктәптә укучыларның ата-аналары «Татарстан 24» каналына мөрәҗәгать иткән. Алар уку йорты директорыннан һәм укытучылардан зарлана. Ата-аналар сүзләренчә, балалар мәктәптә тәмәке тарта, хәтта хәмер эчәргә дә мөмкиннәр. Укытучылар исә бу хәлне тыю түгел, киресенчә, актив катнаша, диелә бу хәбәрдә.
«Яңа директор килгәч, тәртипсезлек башланды, укытучылар балалар белән спиртлы эчемлекләр эчә, электрон тәмәке тарта, сүгенә башлады», – дигән ата-аналар.
Видео кадрларында башлангыч сыйныфта укытучы хатын-кызның чыннан да укучылар белән тәмәке тартуы һәм алкоголь куллануы күренә, дип хәбәр иткән иде «Татарстан 24».
Мәктәп директоры ата-аналарның зарланып мөрәҗәгать иткәне булмавын әйткән. Мәктәп сакчысы исә исерек яки тәмәке тарткан укучыларны күрмәвен белдергән.
«Мин укучыларны күрәм. Бу – яла ягу, нормаль директор һәм укытучылар», – ди ул.
41нче мәктәпкә Мәгариф идарәсе хезмәткәрләре барган һәм тикшерү оештырганнар.
Тикшерү нәтиҗәләре буенча, видеода сурәтләнгән укытучы хатын-кыз эштән азат ителгән. Бүген мәктәпкә полиция килгән.
Россия Эчке эшләр министрлыгының Казан буенча идарәсенең матбугат хезмәте җитәкчесе Рафаэль Сәгъдиев сүзләренчә, хәбәрдә күрсәтелгән фактлар расланган. Укытучыга карата КоАП РФ 6.10 «Балигъ булмаган кешене алкогольле һәм спиртлы продукция, яңа потенциаль куркыныч психоактив матдәләр яки юләрләндерә торган матдәләр куллануга җәлеп итү» маддәсе буенча административ материал төзелгән.
