Казан кызы «Лучше всех!» тапшыруында Максим Галкинга курай бүләк итте

Казан кызы унбер яшьлек Амелия Гатина «Беренче канал»да «Лучше всех!» тапшыруында алып баручы Максим Галкинга татар һәм башкорт музыка уен коралы — курай бүләк итте. Максим Галкин бүләкне алганнан соң, шаяртып, ахырга кадәр бу әйбер «чурчхела булыр дип өметләнгән идем», ди.

Ул бүләк ителгән уен коралында уйнарга тырышып карый һәм кайнап торган чәйнек кебек сызгыра. «Кайнап чыкты!» — ди алып баручы ахырда.

Алып баручыга ничек уйнарга кирәклеген Амелия үзе күрсәтә: курайда «Әпипә» көен уйный. «Амелия Россия күләмендә үткәрелгән конкурсларда да, халыкара бәйгеләрдә дә гел беренче-икенче урыннарга лаек була», — ди кызның залда утыручы укытучысы.

Кызчык Мәскәүнең «Яңа классика» камера оркестры белән берлектә «Узган елгы кар ява иде» мультфильмыннан композиция башкара.

Амелия әңгәмә барышында алып баручыга һәрвакыт померан шпицы токымлы көчек турында хыялланганын әйтә. Аның теләге тормышка аша — аңа померан шпицы көчеге бүләк итәләр. Амелия шатлыгыннан күз яшьләрен тыя алмый. Көчекнең яңа хуҗабикәсе аны Максим Галкин хөрмәтенә Макс дип атаячагын әйтә.