видеодан скриншот
Казан Кремле янында дрифт ясап йөргән егетнең машинасын алганнар. Бу турыда «Татарстан 24» каналы хәбәр итте.
21 яшьлек егет Казан Кремле стенасы янында «тамаша» ясый. Моны видеога төшереп торалар. Кадрларда машина йөртүче махсус рәвештә шуып борыла – дрифт ясый. Дрифтерны видеога төшерүче оператор да чак кына тәгәрмәч астына эләкми кала.
Урынга ЮХИДИ инспекторлары килә. Биредә алар «тукталыш тыела» дигән билге янында туктап торучы «Лада»ны күрә. Машинаның техник халәтен тикшергәч, руль идарәсе дөрес булмавы ачыклана. Шуннан соң машинаны «махсус стоянка»га алып китәләр, йөртүчегә протокол төзиләр, диелә хәбәрдә.